Kapayapaan, ‘wag digmaan
May mga nagsasabing humanda tayo sa isang digmaan sa China. Ito’y kaugnay ng ‘di mapawing tension sa West Philippine Sea. Wait lang! Mapaminsala at magastos ang giyera at walang panalo riyan.
May grupong nagsusulong ng “kapayapaan at hindi digmaan.” Binubuo ito ng mga industriyalista, geopolitical scholars at mga pambansang leader na pinangungunahan ni dating Senadora Anna Dominique “Nikki” Coseteng.
Ani Coseteng, huwag ituring na kaaway ang China kundi isang kaibigan at simulan, kasama ang bansang ito ang paghanap ng mapayapang solusyon sa suliranin. “Walang nananalo sa digmaan. Huwag tayong susuong dito,” aniya.
Kasama ang ilang mga media practitioners sa paghanap ng daan tungo sa kapayapaan sa pakikitungo sa China at iba pang kasangkot na bansa sa usapin sa WPS.
Kabilang din sa advocacy group ang industrialistang si Cecilio Pedro, immediate past president ng Federation of Filipino-Chinese Chambers of Commerce (FFCCC), na lumahok sa Pandesal Forum na inorganisa ng kaibigan kong kolumnista na si Wilson Lee Flores.
Dalawang geo-political scholars ang lumahok. Ito ay sina Dr. Rommel Banlaoi ng University of the Philippines at New Era University at Prof. Richard Heydarian ng Dela Salle University.
Sa kawalang katiyakang sitwasyon sa mundo, “Kapayapaan ba o giyera ang sagot?” Iyan ang paksang tinalakay. Pinuna ni Coseteng ang pagbili ng pamahalaan ng fighters jets, imbes na ilaan ang malaking halaga sa paglutas sa problema sa pagkain.
Bilang immediate past president ng FFFCC, sinabi ni Pedro na mas mahalagang isulong ang kapayapaan imbes na digmaan sa China. Kailangan aniya ang people to people interaction ng mga Pilipino at Chinese upang higit natin silang makilala at mapawi ang hindi pagkakaunawaan.
Lahat ng mga dumalo sa forum ay nagkakaisa sa adhikaing humanap ng daan tungo sa kapayapaan upang payapain ang umiigting na tension sa WPS. “Hindi dapat maging option ang digmaan” ani Banlaoi. Tama naman. Nakatatakot ang giyera dahil napakaliit natin para sumagupa sa dambuhalang gaya ng China.
- Latest
