Epekto sa pagkapriso ni Duterte
Tulo ra ka survey organizations ang akong gisunod: Social Weather Stations (SWS), Pulse Asia ug OCTA. Surveys sa SWS ug Pulse Asia nitakdo sa resulta sa nangaging mga eleksiyon. Samtang bilib ko sa pagpasabot sa OCTA sa mga numero sa pandemya sa Covid-19.
Ila rang surveys sa mga nanagan sa eleksiyon karong Mayo 12 ang akong gisubay. Dihang gipagawas sa OCTA ang resulta sa ilang senatorial survey sa Marso, nga gihimo human gidakop si kanhi Presidente Rodrigo Duterte, akong gisusi nisulbong bang iyang mga kandidato ug nihagsa bang taga administrasyon.
* * *
Duha ra ka kandidato ni Duterte ang nisaka: Numero uno si Bong Go (ikaduha sa Pebrero) ug ikasiyam si Bato dela Rosa (ika-15 sa Pebrero). Pero nagpabilin gawas sa Magic 12 ang ubang gisuportahan, gipangulohan ni Phillip Salvador sa ika-19.
Si Go ang tinuod nga namangka sa duha ka suba. Nagpasalipod sa platapormang malasakit aron paglikay sa extrajudicial killings pero sikit gihapong Duterte aron pagsipong sa mga dumadapig sa kanhi presidente. Masaligon kong matagak si dela Rosa sa sunod nga survey. Kay kinsa may ganahang mobotar og senador nga motago?
* * *
Sayop ang basa nilang Imee Marcos ug Camille Villar nga mo-simpatiya ang mga botante ni Duterte human siya napriso. Nitibugsok si Imee sa ika-18 sa Marso (gikan sa ika-12 sa Pebrero). Samtang nitidlom si Camille sa ika-11 (gikan sa ikawalo sa Pebrero).
Laing natagak sa administrasyon mao si Francis Tolentino (ika-17 sa Marso gikan sa ika-16 sa Pebrero). Naapsan sa ika-15 nga si Bam Aquino (ika-18 sa Pebrero) ug ika-16 nga si Kiko Pangilinan (ika-17 sa Pebrero).
* * *
Natagak sab pero nagpabilin sa Magic 12 silang: Abby Binay (ika-10 sa Marso gikan sa ika-6 sa Pebrero); ug Manny Pacquiao (ika-12 sa Marso gikan sa ika-9 sa Pebrero). Ni-us-os sab si Willie Revillame (ika-13 sa Marso gikan sa ika-11 sa Pebrero).
Apil sa nisaka mao silang Ping Lacson (ika-7 sa Marso gikan sa ika-13 sa Pebrero); ug Pia Cayetano (ika-8 sa Marso gikan sa ika-10 sa Pebrero). Makapasubo nga usa sa labing takos nga molingkod sa Senado nga si kanhi Commissioner Heidi Mendoza sa Commission on Audit (COA) ika-31 ra sa Marso.
* * *
- Latest
