EDITORYAL - Panahon na para itigil ang POGOs
Walang naitutulong ang Philippine Offshore Gaming Operators (POGOs) sa kabuhayan ng bansa. Mula nang mag-operate ang POGOs noong 2017, hindi nagkaroon ng pagbabago sa ekonomiya at lumubog pa dahil maraming hindi nagbabayad ng buwis. Panahon ni President Duterte, na pinahintulutan ng Philippine Amusement and Gaming Corporation, nang mamayagpag ang POGOs sa bansa. Sa lahat nang bansa sa Asya, tanging ang Pilipinas ang may POGO. Isinuka ito sa Malaysia, Singapore at maski sa China, ipinagbabawal ito roon. Tanging Pilipinas lang ang yumakap sa POGO.
Maraming mambabatas na ang nagpahayag ng pagtutol sa POGOs. Ipinasususpende na nila ang operasyon nito dahil wala namang naitutulong. Ikinatwiran ng mga mambabatas na perwisyo ang POGOs sapagkat mula nang mag-operate sa bansa, dumami ang krimen. Tumaas ang bilang ng kidnap-for-ransom. Pati ang human trafficking ay tumaas din. Kinikidnap ang kapwa nila Chinese at saka ipatutubos. Kapag hindi tinubos, papatayin ang kinidnap.
Nang kapanayamin si Sen. Sherwin Gatchalian sa TV, sinabi nito na sa kanilang pagsisiyasat, ang mga nagmamay-ari ng POGOs ay karaniwang mga miyembro ng sindikato sa China. Kaya nang lumipat sila rito, naging laganap ang krimen. Sinabi rin ni Gatchalian na inutil ang PAGCOR sa POGOs. Walang ginagawang aksyon sa mga ginagawang paglabag ng POGOs. Isinusulong ni Gatchalian ang pagpapatigil ng POGOs.
Noong Enero, sinabi ni President Ferdinand Marcos Jr. na naghahanap pa raw siya nang magandang dahilan para ipatigil ang POGOs sa bansa. Ang talaga raw problema ay ang illegal POGOs dahil hindi nagbabayad ng buwis ang mga ito. Ang mga nangyayaring patayan daw ay kagagawan ng illegal POGOs. Marami na raw pina-deport na personnel na nagmamantini ng illegal POGOs.
Hindi na kailangang maghanap pa nang magandang dahilan para ipagbawal ang POGOs. Sa mga nangyayaring krimen na lang, sapat na para ipatigil ang operasyon ng POGOs. Huwag nang hintayin pang dumami ang krimen na pati mga Pilipino ay kikidnapin at ipatutubos. Huwag ding hayaang maging balwarte ng sugalan ang Pilipinas.
- Latest
