Kelot, tiklo sa higit P1.6 milyong high-grade marijuana

MANILA, Philippines — Kalaboso ang isang lalaking delivery rider matapos maaktuhang nagbebenta ng mahigit isang kilo ng “KUSH” o high-grade marijuana sa Pasig City na nagkakahalaga ng P1.6 milyon.

Sa ulat ni Eastern Police District (EPD) Director PBGen. Aden Lagradante, nakilala ang nahuling drug suspek sa alyas “Buknoy” na taga-Pateros subalit naaresto sa ikinasang buy-bust operations sa Brgy. Pinagbuhatan.

Ayon kay Lagradante na matagal nang tinitiktikan ang naturang high value target sa iligal nitong operasyon kaya’t agad na itong dinakma nang positibo ang pagbili sa kaniya ng poseur-buyer na pulis.

Nakumpiska kay “Buknoy” ang naturang iligal na droga na nagkakahalaga ng P1,650,000.

Inihahanda na ng Pasig City Police ang pagsasamapa ng kasong paglabag sa Dangerous Drugs Act of 2002.