2 Suspect sa pagpatay sa bebot timbog
MANILA, Philippines — Naaresto na nang mga operatiba ng pulisya ang dalawang suspect na umano’y sangkot sa pagpatay sa isang 34-anyos na babae habang patuloy pa ring pinaghahanap ang itinuturong gunman sa Valenzuela City.
Kinilala ni Valenzuela Police OIC chief P/Col. Relly Arnedo ang mga naarestong suspect na sina alyas “Jun-jun”, ng Tampoy St., Brgy. Marulas at alyas “Charlie”, na driver umano ng motorsiklo habang tinutugis pa ang isang alyas “Jeff” na sinasabing bumaril sa biktima.
Bandang alas-5:55 ng hapon nitong nakalipas na Huwebes nang pagbabarilin ng isa sa riding-in-tandem ang biktimang si Jennelyn Ramos ng Brgy. Marulas sa panulukan ng F. Bautista St. at McArthur Highway, Brgy. Marulas na nagresulta sa daglian nitong kamatayan sanhi ng tinamong mga tama ng bala sa ulo at katawan.
Sa pahayag sa pulisya ni alyas “Anthony” 42, dating kinakasama ng biktima ay ginastos at hindi umano nai-remit ng biktima sa isang alyas “Buchoy” ang drogang nagkakahalaga ng P25,000 noong Mayo 3 na siyang motibo ng krimen.
Nabatid na nakatanggap ng tip ang mga pulis mula sa mga kaanak ni ‘Jun-jun’ sa presensya nito sa lugar kaya agad nagsagawa ng follow-up operation ang mga operatiba ng pulisya at nasakote ito.
Samantalang sa interogasyon ay ikinanta naman ni Jun-jun sa mga pulis ang kanya umanong mga kasabwat na sina ‘Jeff’ at ‘Charlie’, na kapwa nagtatago sa Northville, Barangay Canumay West. Nasakote naman sa follow-up operation si Charlie.
- Latest
