Senior na hit-and-run ng 3 sasakyan
MANILA, Philippines — Isang senior citizen ang namatay matapos na ma-hit-and-run ng dalawang magkasunod na SUV at isang Sedan habang tumatawid sa Brgy. Silangan, Quezon City.
Sa naantalang report ng Quezon City Police District (QCPD) Traffic Sector, nangyari ang pagsagasa sa biktimang si Rosemarie Orcine, 61, bandang alas-7 ng gabi nitong Sabado (May 17) sa panulukan ng Illinois St., at Aurora Boulevard, sa Brgy. Silangan, sa lungsod.
Makikita sa CCTV na tumatawid ang biktima nang unang mabundol ng isang itim na SUV na mabilis ding tumakas. Dito ay humandusay na ang biktima kalye.
Makalipas ang ilang segundo, isang puting SUV naman ang nakasagasa sa biktima at tumakas din.
Sa ikatlong pagkakataon, isang sedan na papaliko sa lugar ang muling nakasagasa at kumaladkad sa biktima. Huminto ito upang tignan ang kayang nasagasaan.
Nasa kustodiya na ng QCPD ang driver ng ikatlong sasakyan. Sa pagtatanong ng pulisya madilim sa lugar kaya hindi nakita ang biktima.
Patuloy ang masusing imbestigasyon at follow-up operation na isinasagawa ng QCPD upang matukoy ang mga drayber ng itim at puting SUV na nahaharap sa kasong reckless imprudence resulting in homicide.
“Hinihikayat namin ang sinumang may impormasyon ukol sa mga sangkot na sasakyan o drayber na agad na makipag-ugnayan sa pinakamalapit na himpilan ng pulisya o tumawag sa QC Helpline 122”, ani QCPD officer-in-charge at Deputy District Director for Administration PCol. Randy Silvio.
- Latest
