Mag-ina, driver pisak sa karambola ng 6 sasakyan
MANILA, Philippines — Tatlong katao ang kumpirmadong patay habang 10 iba pa ang sugatan nang mawalan ng preno ang isang trailer truck habang paakyat sa kalsada sa Marikina City kamakalawa ng gabi at minalas na maatrasan ang limang sasakyan na kasunod nito.
Kabilang umano sa mga nasawi ay isang mag-ina at driver ng isa sa mga kotse nasangkot sa aksidente.
Lumilitaw sa ulat ng Marikina City Police na dakong alas-11 ng gabi nang maganap ang aksidente sa Fortune Ave., sa Brgy. Fortune, Marikina City na kinasangkutan ng isang trailer truck (AIA-4084), dalawang jeepney (UVL-565 at TWK-363), isang sedan (UHJ-899), at dalawang sports utility vehicle (UHJ-899 at NAV-2836).
Nauna rito, binabagtas umano ng mga naturang behikulo ang paakyat na bahagi ng eastbound lane ng Fortune Avenue, kung saan nauuna ang trailer truck na minamaneho ni Gabriel Almeda, 54, residente ng Quezon City.
Sa hindi pa matukoy na kadahilanan, nawalan ng preno ang trailer truck at dumausdos sanhi upang maatrasan ang mga kasunod na sasakyan hanggang sa tuluyang tumaob ang karga nitong container at nadaganan ang isa sa mga jeep, ang sedan at isa sa dalawang SUV.
Nasugatan ang mga driver at mga pasahero ng mga nabanggit na sasakyan, na kaagad na naisugod sa Amang Rodriguez Memorial Medical Center (ARMMC) ngunit minalas na masawi ang isa sa mga driver ng jeep, gayundin ng mag-inang sinasabing pasahero ng sedan.
Kaagad namang inaresto ng mga pulis ang driver ng truck na si Almeda na nakapiit na at mahaharap sa kaukulang kaso sa piskalya.
Ipinatawag naman ni Land Transportation Office (LTO) chief Vigor Mendoza II ang registered owner at driver ng trailer truck na sangkot sa nasabing aksidente.
“We want to know what really happened, and part of it is to determine if there were lapses on the part of the registered owner in terms of truck maintenance and the condition of the driver at the time of the accident,” sabi ni Mendoza.
Batay aniya sa kanilang nakalap na impormasyon, overloaded ang trak kaya’t naganap ang aksidente.
Suspendido na ang lisensya ng truck driver habang nakaalarma na sa LTO ang sasakyan.
- Latest
