Secret ni Lovely

Dear Dr. Love,

Ako po si Lovely isang dalagang nasa hustong gulang na at kasalukuyang may boyfriend na tunay kong minamahal.

Marespeto siya, may pangarap sa buhay, at hindi kami nauubusan ng dahilan para ngumiti sa isa’t isa.

Pero may isang malaking balakid sa relasyon namin—ang mga magulang ko.

Hindi nila gusto ang boyfriend ko. Para sa kanila, mababa ang estado niya sa buhay.

Hindi siya “ideal” para sa akin, ayon sa kanilang pamantayan. Masakit marinig ang mga salita nilang tila minamaliit siya, kahit hindi naman nila siya lubos na kilala.

Dahil dito, napipilitan akong itago ang aming relasyon.

Ramdam ko ang bigat sa dibdib sa tuwing kailangan naming magkunwaring wala sa harap nila.

Mali ba akong ipaglaban ang taong mahal ko kahit hindi siya pasado sa paningin ng magulang ko?

Lovely

Dear Lovely,

Hindi sukatan ng tunay na pag-ibig ang antas sa buhay. Ang mahalaga ay ang respeto, pagmamalasakit, at pagkakaroon ng iisang direksyon.

Pero tandaan din na hindi natin maaaring balewalain ang damdamin ng ating mga magulang—madalas, pagmamalasakit lang ang dahilan ng kanilang panghuhusga.

Ang payo ko, huwag itago nang habambuhay ang pakikipagrelasyon.

Dahan-dahang ipakilala muli ang iyong boyfriend sa kanila—hindi bilang “boyfriend,” kundi bilang isang mabuting tao.

Hayaan mong siya mismo ang magpatunay ng kanyang halaga. At higit sa lahat, maging matatag kayo pareho.

Sa tamang panahon, ang tunay na pag-ibig, kapag totoo at matatag ay kayang baguhin ang paningin ng kahit sinong magulang.

Magpakatotoo ka—hindi kailangang palihim ang pagmamahal, basta’t may respeto.

DR. LOVE