Pangulong Marcos, First Lady balik-Pinas mula Vatican

MANILA, Philippines — Nakabalik na sa bansa si Pangulong Ferdinand Marcos Jr. at First Lady Liza Marcos matapos dumalo sa libing ni Pope Francis sa Vatican noong Sabado.

Sinabi ng Presidential Communications Office (PCO), dakong alas-7 kahapon ng umaga ng dumating ang First Couple matapos ang maiksing biyahe sa Vatican City.

Huwebes ng gabi ng tumulak patungong Vatican ang Pangulo at Unang Ginang.

Bago naman bumalik sa bansa ay nagkaroon ng side-trip ang Pangulo at Unang Ginang kung saan nagkaroon ng romantikong hapunan ang dalawa sa Rome, Italy na ayon sa post sa social media page ni FL Liza ay anniversary dinner nila ng Pangulo.

Bukod sa Pangulo at Unang Ginang, kasama nilang nakipaglibing sina U.S President Donald Trump, King Philipp VI ng Spain, Ukraine President Volodymyr Zelensky, Prince William ng Great Britain, United Kingdom Prime Minister Keir Starmer, French President Emmanuel Macron at iba pa.

Sinabi ng PCO na walang official na schedule ang Pangulo nitong Lunes.