Bigas sa halip na cash ayuda – Romualdez

MANILA, Philippines — Sa halip na cash transfers, target ng liderato ng Kamara na magkaroon ng “rice subsidy programs” sa buong bansa.

Ayon kay House Speaker Ferdinand Martin Romualdez, popondohan ng Kamara ang rice subsidy system sa ilalim ng 2026 National Budget.

Sinabi ni Romualdez na sa ngayon ay nakikita nila na mas epektibo ang isang rice subsidy program sa halip na perang ayuda.

Ang paglalaan aniya ng murang bigas sa mga tao ay direktang makatutugon sa kagutuman at tiyak umanong makakarating ang tulong sa hapag-kainan ng mga pamilyang Pilipino. Ibig sabihin, mas mainam na bigas na ang ipamigay para nakabubusog, nakakatulong at tiyak ang patutunguhan, na malaking-bagay din sa seguridad sa pagkain.

Ang pahayag ay kasunod ng nakatakdang bentahan ng P20 kada kilo ng bigas na sisimulan sa Visayas.