Oplan Biyaheng Ayos ng PCG sa Semana Santa, nakalatag na

MANILA, Philippines — Nakalatag na ang Oplan Biyaheng Ayos ng Philippine Coast Guard (PCG) para sa darating na Semana Santa at Summer 2023 para masiguro ang kaligtasan at seguridad ng mga pasahero na dadagsa sa mga pantalan.

Ayon kay PCG Commandant, Admiral Artemio M. Abu, idedeklara ang “heightened alert” mula Abril 2  hanggang Abril 10 para masiguro na mananatiling maayos ang maritime operations at komportable ang biyahe ng mga tao na uuwi sa kani-kanilang probinsya at mga turistang bibisita sa mga tourist destinations.

Kinabibilangan ito ng mga K9 units, medical teams, security personnel, harbor patrollers, vessel inspectors, at deployable response groups.

Ito ay para mapaigting ang presensya ng PCG sa mga port passenger terminals, gayundin sa malawak na katubigan ng bansa para mabantayan ang maritime traffic.

“Para maging ligtas ang pagbabakasyon ng mga turista, siniguro natin na well-trained ang mga lifeguards at iba pang first responders na naka-deploy sa mga beaches, island resorts, at iba pang maritime tourism spots, lalo na sa Visayas at Min­danao,” ayon kay Abu.

Magtatayo rin ng first aid at rescue equipment facilities ang PCG sa mga matataong tourist destinations para agad na maka-responde sa oras na magkaroon ng hindi inaasahang insidente.