Duha ka centenarian gihataga’g tag P100 milyon

CEBU, Philippines — Nakadawat og tag P100,000 gikan sa kagamhanan sa Probinsya sa Sugbu ang duha ka centenarian sa lain-laing mga lungsod sa habagatang Sugbo.

Si Gobernador Gwendolyn Garcia mismo ang mitunol sa mga tseke ngadto sa mga centenarian nga taga lungsod sa Argao ug Boljoon niadtong Nobiyembre 29, atol sa laing hugna sa Caravan of Government Services nga gipahigayon sa lungsod sa Dalaguete.

Si Catalina Alcalde, nga taga Barangay Sua sa Argao, ug si Petra Ubas, nga taga Barangay Poblacion sa Boljoon, malipayong midawat sa tabang pinansyal gikan sa Kapitolyo.

Ang maong tabang gipadayag isip pagpasalamat sa ilang dugay nang serbisyo ug kontribusyon alang sa ilang tagsa-tagsa ka komunidad.

Si Alcalde natawo niadtong Oktubre 5, 1924 samtang si Ubas nakab-ot ang ika-100 nga edad niadtong Oktubre 8.

Matud pa sa Sugbo News sa Kapitolyo, ang sekreto sa duha sa taas nga kinabuhi mao ang pagmentinar sa himsug nga lifestyle ug ang hugot nga pagtuo sa Ginoo.

Gawas sa tseke, gitagaan usab sila og mga bitamina, wheelchair alang sa mga hamtong, ug Abag Sugbo cards nga naghatag kanila og libreng medikal nga konsultasyon ug tambal sa bisan asa sa 16 ka ospital nga gipadagan sa Kapitolyo.

Ang Department of Social Welfare and Development (DSWD) naghatag usab ug dugang nga tabang pinaagi sa food packs ug P2,000 nga pinansyal nga ayuda. Samtang, ang Department of the Interior and Local Government (DILG) mihatag usab og lima ka kilo nga bugas ug tsinelas sa duha ka centenarian.  IBM BANAT NEWS