35 ESSI projects gilusad para sa 4Ps

CEBU, Philippines — Gipahibalo sa Department of Social Welfare and Development Field Office 7—Central Visayas nga P7,296,687.00 nga pundo ang ilang nagahin para sa Pantawid Pamilyang Pilipino Program pinaagi sa 35 ka proyekto ubos sa Enhanced Support Services Intervention (ESSI) para nila.

Ang ESSI tabang kini para sa mga benepisyaryo sa 4Ps, ilabina kadtong mga indigenous people (IP), mga pamilyang walay puy-anan, ug uban pang huyang nga mga grupo sama sa mga mag-uuma, mangingisda, ug kadtong nagpuyo sa Geographically Isolated ug Disadvantaged Areas (GIDAs).

Ang mga proyekto sa ESSl naglakip sa mga eco-cultural livelihood assistance ug income generation projects, community ug youth development projects, small-scale community projects, alternative family homes, ug cash for work.

Sumala sa press release sa DSWD, pipila ka mga proyekto sa ESSI sa lalawigan sa Bohol mao ang rice ug feed retails ug ang produksyon sa liquid detergent, liquid dishwashing, ug fabric conditioner in Brgy. Bugsoc, Sierra Bullones, ug tabang kapital para sa retail store management sa Brgy. Del Carmen Western sa lungsod sa Balilihan.

Sa Sugbo, pipila sa mga aprobado nga proyekto mao ang tabang kapital sa Hagdan Dried Fish Asosasyon sa Brgy. Hagdan, Santa Fe: rice ug feed retailing sa Brgy. Hilotongan sa Bantayan; pagpamuhi o pagpatambok og baboy sa Brgy. Esperanza sa Poro; ug poultry production sa native nga manok sa Brgy. Kanghumaod sa lungsod sa Dumanjug.

Samtang, para sa Negros Oriental, giaprobahan sa DSWD ang capital assistance sa pagpatambok sa kanding sa Brgy. Cangguhob sa Mabinay, egg layer production sa Brgy. Tubod, Bindoy, ug capital assistance para sa Brgy. Poblacion 1 RCCT L2 Consumers Enterprise project sa Bais City.

Sa probinsya sa Siquijor, ang gipundohan nga ESSI project kay ang pagpamuhi og baboy sa barangay Cang-alwang ug Tonga sa Siquijor.

Matud ni Regional Director Shalaine Marie Lucero, kining pundo sa ESSI gikonsiderar nga revolving fund o pahulam nga walay interes.

Kining mga proyektong gigamitan niini tabang kini para sa mga miyembro sa 4Ps aron sila mopalambo niini ug mokita gikan niini aron dili na sila magsalig.

Usa sa malampusong ESSl mao ang Bagayanon Bigasan ug General Merchandise sa Daanbantayan, Cebu, diin 76 ka benepisyaryo sa 4Ps nakadawat og kapital nga PHP760,000.00 niadtong 2018. Sukad giablihan niadtong Oktubre 18, 2018 nakaginansiya sila og P54,292.80 paglabay sa duha ka tuig.

Niadtong 2021, mibalhin sila og mas maayong pwesto ug gitukoran nila karon og permanenteng tindahan.  IBM BANAT NEWS