Naa sa public service gihagit himoong sumbanan  si Andres Bonifacio

CEBU, Philippines — Gihagit ni Cebu City Vice mayor Donaldo “Dondon” Hontiveros ang iyang mga kauban nga naa sa public service nga himoong sumbanan si Andres Bonifacio pinaagi sa pag-trabaho nga dunay integrity, pagtamod sa hustisya, ug unahon ang kaayohan sa katawhan inay sa kaugalingon.

Si Hontiveros maoy nangulo sa kalihukan sa ika-161 nga birth anniversary ni Andres Bonifacio diha sa Plaza Independencia, Cebu City human wa katambong si mayor Raymond Garcia.

Lakip sa nitambong mao sila si Cebu City North District Representative, Cutie del Mar, City Councilor Francis Esparis, ug Cultural and Historical Affairs Commission Commissioner ug kanhi city councilor Arsenio Pacaña.

Matud pa ni Hontiveros nga sa pila ka higayon nga siya nakatambong sa mga kalihukan sa Bonifacio Day, kagahapon lang niya nabantayan ang monumento ni Bonifacio diin ang mga tudlo niini daw sa nagtudlo kaniya ug mihagit kaniya ingon man sa ubang mga Filipinos.

  "As I stayed there in front, I felt that in a way, he(Bonifacio) is challenging us…In way, he is reminding us, “I`’ve done my part…Unsa man man puy inyong buhaton?” suma pa ni Hontiveros.

Samtang gisaulog usab sa kagamhanan sa siyudad sa Mandaue ang Bonifacio Day kagahapon diha sa Mandaue City Heritage Plaza.

Ilang gipasidunggan ang mga bayanihong buhat ni Gat Andres Bonifacio, isip usa sa mga lider sa pakigbisog alang sa kagawasan sa Pilipinas.  

Ang mga opisyales sa dakbayan nga gipangulohan ni Bise Mayor Nerissa Soon-Ruiz ang nangulo sa kalihokan pinaagi sa paghalad og pongpong sa mga bulak sa iyang monumeto nga nahimutang usab sa Heritage Plaza sa Dakbayan sa Mandaue.

Gihatagan og gibug-aton sa mga opisyales sa Mandaue City ang natampo ni Gat Andres Bonifacio sa kasaysayan sa Pilipinas nga nakigbisog sa kagawasan. —Gikan sa The Freeman MEL  BANAT NEWS