Habal-Habal drivers gamiton pagbantay sa krimen

CEBU, Philippines — Giplanohan karon sa bag-ong station commander sa siyudad sa Sugbo nga gamiton ang mga habal-habal drivers ug mga miyembro sa social groups aron makatabang sa pagsumpo ug pakigbatok sa bisan unsang krimen sa dakbayan.

Kini human sa gisugyot nga centralized radio system alang sa mas dali nga pagresponde sa bisan unsa nga alarma.

Si Police Major Timothy Jim Romanillos, ang bag-ong nadestino nga acting head sa Labangon Police Station mitug-an nga tinguha nila nga i-enlist ang mga habal-habal drivers isip mga force multipliers.

“Nakita nako nga daghan kaayo ta og habal-habal drivers.  Kung ato ni silang ma organize, mas paspas ang information (gathering). Kani silang mga tawhana mao ni sila ang makasud sa pinakasud nga dili masud sa atong patrol,” suma pa ni Romanillos pinaagi sa Sugbuanon channel.

Kining maong plano magsugod sa iyang hurisdiksyon dili lang sa barangay Labangon kundili apil na sa Punta Princesa, Tisa, Quiot, ingon man sa barangay Toong ug Buhisan.

Matud pa ni Romanillos nga daku og ikatabang ang mga habal-habal drivers tungod kay suhito kini sa mga lugar ilabi na sa mga mountain barangays ubos sa PS station 10. “Kung naa man ganey mahitabo diha, ma report nila nato ug maaksyonan dayun nato. Mas dali ang atong paghatag og serbisyo sa katawhan,” dugang pa niya.

Nagkanayon usab si Romanillos nga ang mga habal-habal drivers makatabang kaayo sa ilang kampanya batok kriminalidad ilabi na sa kalihukan sa illegal nga drugas. Hinuon siya miingon nga moagi og makuti nga paghashas ang mga Habal-habal drivers sa dili pa sila i-tap nga moabag sa kapolisan.

“Una, ato gyud sila i-identify. Aside nga makakuha ta og information sa ilaha, ato ni sila magamit…Kung makuha nato ning mga tawhana nga na involve dati sa illegal (activities), maduol sila sa PNP, moiwas nani sila sa ilang binuhatan dati,” segun pa ni Romanillos.

Gawas sa mga habal-habal drivers, si Romanillos nagplano usab sa pag-recruit sa mga miyembro sa fraternities ug sororities alang sa iyang peace and order campaign.

Sa nasayran gisugyot usab sa bag-ong station commander sa Carbon Police Station, Police Major Erwin Abrasado nga himoon ang centralized radio system aron mas dali ang pagmonitor ingon man sa pagdakop sa mga criminal.

Suma pa ni Maj. Abrasado nga tinguha niya nga mas dali ang pag-responde sa mga otoridad sa bisan unsa nga insidente ug mas dali ang ilang communication pinaagi sa paggamit og walkie-talkie ikumpara sa ilang mga mobile phones. —Gikan sa The Freeman/MEL BANAT NEWS