Upat ka kadaugan naangkon sa Pilipinas sa WTA Awards

CEBU, Philippines — Laing kadaugan ang naangkon sa Pilipinas sa 2024 World Travel Awards Grand Final sa Savoy Palace, Funchal, Madeira, Portugal ug naangkon na niini ang tinguha nga mahimong premiere tourist destination sa tibuok kalibutan.

Sulod sa sunod sunod nga unom ka tuig, ang nasud midaug isip World’s Leading Dive Destination.

Sumala sa Department of Tourism, nga kining maong kadaugan nagmatuod sa dugay na nga reputasyon sa nasud nga nahimong paraiso sa mga diving enthusiasts kun sa mga mahiligon sa diving.

Lakip sa pipila nga girekomendar sa DOT nga dive spots sa nasud mao ang nahimutang sa Cebu apil ang mga isla sa Mactan, Pescador island sa Moalboal, Sumilon island sa Oslob ug Malapascua island sa Daanbantayan.

Samtang ang Manila, napili nga World’s Leading City Destination.

Ang Boracay island, nidaug isip World's Leading Luxury Island Destination gumikan sa iyang nindot nga mga beaches.

Gawas niana ang DOT nga gipanguluhan ni Cebuana Tourism chief Christina Frasco nigawas usab nga mananaug isip World’s Leading Tourist Board ug kini mao ang unang higayon nga naangkon kini sa DOT.

Si Sec.Frasco daku ang pasalamat sa maong global recognition, ug miingon nga ang panagtambayayong sa tanang maoy usa sa hinungdan sa maong kadaugan.

“We are filled with immense pride and gratitude as the Philippines continues to capture the hearts of travelers worldwide, as reflected in these prestigious accolades at the 2024 World Travel Awards,” suma pa ni Frasco. Niadtong buwan sa Septiyembre ning tuiga nakuha usab sa nasud ang walo ka regional awards pinaagi sa WTA’s Asia & Oceania, ug kini mao ang Asia’s Leading Dive Destination, Leading Beach Destination, Leading Island Destination uban sa Intramuros isip Asia’s Leading Tourist Attraction, Boracay isip Asia’s Leading Luxury Island Destination, ug Cebu isip Asia’s Leading Wedding Destination for its romantic charm and world-class venues.

Samtang ang Love the Philippines campaign bisan pa og nakontrobersyal ang nakadaug isip Asia’s Leading Marketing Campaign 2024 award. —Gikan sa The Freeman/MEL BANAT NEWS