Arnell Ignacio iniimbestigahan sa P1.4 bilyong land acquisition!

Dawit sa anomalya sa OWWA

MANILA, Philippines — Iniimbestigahan na ng Deparment of Migrant Workers (DMW) ang umano’y maanomalyang P1.4 bilyong land acquisition deal ng Overseas Workers Welfare Admi­nistration (OWWA).

Sa news forum sa Que­zon City, sinabi ni DMW Undersecretary Patricia Yvonne Caunan, mayroon nang ginagawang imbestigasyon ang DMW tungkol sa isyu at hahayaan nilang gumulong ang proseso rito.

Si Caunan ang pumalit kay dating OWWA administrator Arnell Ignacio na sinibak sa puwesto, dahil sa “loss of trust and confidence” dulot ng alegasyon ng maano­malyang P1.4 bilyon land acquisition deal na pinasok nito kahit walang pahintulot ng OWWA Board.

“As the new adminis­trator of OWWA, we will perform the neces­sary audit, we will seek the required legal opinion­ from the Department of Justice and we will engage with the Commission on Audit,” ayon pa kay Caunan.

Ayon pa sa bagong OWWA chief ang bini­ling lupa ay para sa “half-way house” o dormitory type accomodation ng mga Overseas Filipino Workers na matatagpuan malapit sa Ninoy Aquino International Airport (NAIA) Terminal 1. Ang nasabing kasunduan ay pinasok noong Setyembre 2024.

Paliwanag ni Caunan na base sa OWWA law ang pagbili ng real proper­ty ay dapat aprubahan ng Board of Trustees ng OWWA at Chairman of the Board na kalihim naman ng DMW, at ang Vice Chair ay ang OWWA Administrator.

Sa kabila nito, nilinaw ni Caunan na hindi naman nagalaw ang pondo ng OWWA na mula sa kontribusyon ng mga miyembro ng OFWs, seafarers at kanilang employers. Lumalabas na ang 2025 na pondo ng OWWA ay P2.973 bilyon bukod pa ang P3.409 bilyon fund ng ahensiya sa ilalim ng General Appropriations Act.