Lolo, apo dedo sa lumubog na Bangka

MANILA, Philippines — Isang maglolo ang nasawi matapos na lumubog ang sinasakyan nilang bangka sa karagatan ng Brgy. Manduyong, Badian, Cebu nitong Sabado de Gloria.

Kinilala ang mga nasawing biktima na sina Silvio Verano, 67-anyos at apo nitong si Lhenyl Faith Verano Diez.

Sa ulat ng Badian Police, nangyari ang insidente sa bahagi ng nasabing karagatan bandang ala-1:30 ng hapon.

Nasagip naman ng mga nagrespondeng mga ­tauhan ng Badian Municipal Disaster Risk Reduction and Management Office (MDRRMO) ang dalawang menor-de-edad na sina Bea Veronica Verano Biosano, 14-anyos at Solenn Marie Verano Diez, 12-anyos.

Ang nasabing matanda at tatlo nitong apo ay lulan ng bangka nang pasukin ito ng tubig hanggang sa lumubog. Patuloy pang iniimbestigahan ng mga otoridad ang kasong ito.