MANILA, Philippines — Patay ang pitong katao kabilang ang tatlong paslit habang tatlo ang malubhang sugatan nang mauwi sa malagim na trahedya ang isa sanang masayang outing ng isang magkakaanak matapos suwagin ng rumaragasang pickup ang sinasakyan nilang tricycle naganap sa highway ng Purok 6 Taglimaw, Brgy. Patin-ay, Prosperidad, Agusan del Sur nitong Sabado ng umaga.
Dead-on-the-spot sina Dionesio Dahili, 27, driver ng Honda TMX 155 tricycle; at mga sakay nitong sina Imelda Dahili, 50, Jenalyn Daga-Ang Dahili, 28, OFW; Bernadeth Dahili, 25; Sabrena Dahili, 3-anyos; Stephany Dahili, 5 at Ysia Banque, 1-anyos; mga residente ng Purok 4, Brgy. Patin-ay, Prosperidad ng lalawigang ito.
Ang mga sugatan naman ay sina Ma. Dionebelle Dahili, 7, estudyante at Diosebelle Dahili, 5; nasugatan din ang sakay naman ng pickup na kinilalang si Alfredo Minoza.
Sa ulat, dakong alas-10:50 ng umaga, sakay ang siyam na magkakaanak sa tricycle na minamaneho ni Dionesio, at binabagtas ang naturang highway patungo sana sa dagat upang mag-outing nang makabanggaan nito ang isang humahagibis na Nissan Navara pickup (conduction sticker F2 S3470) na minamaneho naman ni Mark Junrell Flores, 29 taong gulang na patungo naman sa Davao City.
Ayon sa mga nakasaksi, mabilis umano ang takbo ng pickup na kinain ang kabilang lane dahilan upang salpukin nito ang kasalubong na tricycle ng mga biktima na kinaladkad pa hanggang sa mapunta sa palayan sa naturang lugar.
Nahaharap na ngayon ang driver ng pickup sa kasong reckless imprudence resulting to multiple homicide at 3 counts ng frustrated homicide.