Monteverde, Alcantara, Meneses pararangalan sa SMC-CPC Awards Night

MANILA, Philippines — Kasama sa mga bida sa magaganap na San Miguel Corporation-Collegiate Press Corps (SMC-CPC) Awards Night sa Disco-very Suites sa Ortigas, Pasig sa Hunyo 30 ay sina Goldwin Monteverde at Randy Alcantara.

Matapos akayin ang kani-kanilang koponan sa kampeonato, mahihirang na ‘UAAP Men’s Basketball Coach of the Year si Goldwin habang si Alcantara ang ‘NCAA Men’s Basketball Coach of the Year.

Matagumpay na inakbayan ni Monteverde ang University of the Philippines hanggang sa Finals upang masungkit ang korona sa UAAP Season 87 men’s basketball championship nang patalsikin sa trono ang mahigpit na karibal na De La Salle University, 66-62 sa Game 3 ng best-of-three finals.

Ikalawang beses ng na­bigyan ng nasabing parangal si Monteverde sa event na suportado ng Philippine Sports Commission, Pilipinas Live at GMA.

Sinaklolohan naman ni Alcantara ang Mapua Univeristy Cardinals para tuldukan ang 33 na taong pagka-uhaw sa titulo nang pagulungin nila ang College of St. Benilde Blazers sa Game 2, 94-82 at masikwat ang titulo sa NCAA Season 100 men’s basketball tournament.

Samantala, si Sherwin Meneses naman ang pararangalang ‘UAAP Wo-men’s Volleyball Coach of the Year’ matapos nitong bigyan ng kampeonato ang National University.

Habang si Dante Alinsunurin ang ‘UAAP Men’s Volleyball Coach of the Year’.

Kabilang sa kikinang sa gabi ng parangal si tactician Jerry Yee bilang ‘NCAA Women’s Volleyball Coach of the Year’ matapos nitong samahan ang CSB Lady Blazers sa kampeonato sa NCAA Season 100 women’s volleyball habang sa men’s division ay si Bryan Vitug ng Arellano University Chief ang Coach of the Year.