Sherbet Fountain maangas sa Special Invitational race
MANILA, Philippines — Nasilayan ng mga karerista ang magandang panalo ng Sherbet Fountain nang sikwatin ang korona sa 2025 PHILRACOM “Special Invitational Race” na nilarga sa Metro Turf, Malvar - Tanauan City, Batangas noong Linggo ng hapon.
Hindi naging madali para sa Sherbet Fountain ang panalo dahil napalaban ng husto ang top favorite sa bandang dulo ng karera nang makipagtagisan ng bilis sa agresibong Ace Of Diamond na siyang humawak ng bandera sa halos buong labanan.
Mabilis na sumibat papalabas ng aparato ang Ace Of Diamond para hawakan agad ang limang kabayong agwat sa humahabol na Windfall.
Umungos pa lalo ang Ace Of Diamond sa kalagitnaan ng karera, umabot na sa anim na kabayo ang bentahe sa Windfall pero nasa tersero puwesto na ang Sherbet Fountain.
Naagaw ng Sherbet Fountain ang unahan sa Ace Of Diamond sa huling 200 meter ng karera pero hindi rin basta nagpatinag ang huli.
Nagkaroon ng matinding bakbakan kung saan ay nakisali pa ang Varatti subalit nanatili ang tikas ng Sherbet Fountain.
Ginabayan ni veteran jockey Mark Angelo Alvarez, naging matatag sa rektahan ang Sherbet Fountain upang tawirin ang meta sa tiyempong 1:37. 4 minuto.
- Latest
