Celtics buhay pa
BOSTON — Bumanat si Derrick White ng 34 points, tampok dito ang pitong three-pointers, para gabayan ang nagdedepensang Celtics sa 127-102 panalo sa Game 5 para makaiwas sa pagkakasibak sa New York Knicks sa kanilang Eastern Conference semifinals series.
Nagsalpak ang Boston ng 22 triples para sa kanilang unang home victory at idikit sa 2-3 ang kanilang duwelo ng New York bagama’t hindi naglaro si Jayson Tatum na nakalasap ng season-ending Achilles tendon injury.
Muling susubukan ng New York na tapusin ang kanilang serye ng Boston sa pamamahala nila sa Game 6 bukas.
Nag-ambag si Jaylen Brown ng 26 points at 12 assists para sa Celtics na hangad maging ika-14 team sa NBA history na nakabalik mula sa isang 1-3 deficit.
Pinamunuan ni Josh Hart ang Knicks sa kanyang 24 points.
Sa Minneapolis, umiskor si Julius Randle ng 29 points sa 121-110 pagsibak ng Minnesota Timberwolves sa Golden State Warriors sa Game 5 ng kanilang Western Conference semis showdown.
Tumipa si Anthony Edwards ng 22 points at 12 assists sa 4-1 pagtapos ng Timberwolves sa kanilang giyera ng Warriors papasok sa conference finals katapat ang mananalo sa semis series ng Denver Nuggets at Oklahoma City Thunder.
- Latest
