Ramirez bumida sa Road Warriors

MANILA, Philippines — Hindi na kinailangan ni Robert Bolick na umiskor ng malaki.

Apat na NLEX players ang tumirada ng double figures para patumbahin ang Terrafirma, 117-87, sa Season 49 PBA Philippine Cup kahapon sa Ninoy Aquino Stadium sa Malate, Manila.

Ang pang-limang dikit na ratsada ng Road Warriors ang nagbigay sa kanila ng 5-1 kartada para patuloy na solohin ang ikalawang puwesto sa team standings.

Bagsak ang Dyip sa ikaanim na sunod na kamalasan para sa 1-6 marka.

Tatlong puntos lamang ang iniskor ni Bolick para sa NLEX na nakahugot ng 21 markers kay rookie forward Brandon Ramirez.

“Coach (Jong Uichico) has been really honest since the start of pre-season to not take any game for granted no matter whoever we’re playing, no matter their standings, no matter their record,” ani Ramirez.

Nagdagdag si JB Bahio ng 17 markers, habang may 15 at 13 points sina Robbie Herndon at Javee Mocon, ayon sa pagkakasunod.

Binanderahan naman ni Kevin Ferrer ang Terrafirma sa kanyang 23 points kasunod ang 15 markers ni Louie Sangalang.

Kaagad inilista ng Road Warriors ang 28-7 abante sa first period patungo sa 63-44 pag-iwan sa Dyip sa halftime.

Huling nakalapit ang Terrafirma sa 63-74 sa third period bago nagsalpak sina Herndon at Mocon ng magkakasunod na three-point shots para muling ilayo ang NLEX sa 86-68 sa huling 32 segundo ng nasabing yugto.

Mula rito ay hindi na nilingon ng Road Warriors ang Dyip sa fourth quarter.