Elasto Painters bagsak sa FiberXers

MANILA, Philippines — Kumawala ang Converge sa fourth quarter upang daigin ang Rain or Shine, 107-97, para sa ikatlong sunod na panalo nito sa 2025 PBA Phi­lippine Cup kahapon sa PhilSports Arena sa Pasig.

Balanseng atake ang ipinamalas ng Fiber­Xers sa pangunguna nina Alec Stockton at Schonny Wins­ton para makatalon sa 4-2 kartada sa likod lang ng unbeaten na Magnolia (4-0) at San Miguel Beer (3-1).

Tumikada ng tig-24 puntos sina Stockton at Winston para sa Converge na isinama ang RoS sa bagong listahan nito matapos unang kaldagin ang Blackwater, 111-80, at Talk ‘N Text, 100-94.

Kung sa opensa namuno ang pambatong backcourt, sina twin towers Justin Ara­na at Justine Baltazar naman ang nagpahirap sa pilay at mas maliit na Elasto Pain­ters.

Humakot ng 18 puntos at 17 rebounds si Arana sahog pa ang 6 assists at 3 steals habang sumikwat ng career-high na 22 rebounds si Baltazar kasama ang 13 puntos, 3 assists, 1 steal at 3 tapal.

May pinagsamang 11 offensive rebounds ang 2 higante para sa kabuuang 20 ng mga bataan ni coach Franco Atienza kumpara sa 11 lang ng Elasto Pain­ters na nagresulta sa 11 second chance points at 56 puntos sa ilalim.

Ito ang ininda ng RoS sa buong laro kahit nakauna pa sa hanggang 7 puntos sa first half.

Hindi rin nakatulong ang patuloy na kawalan nina Beau Belga, Caelan Tiongson at Shaun Ildefonso kahit pa nagbalik-aksyon si Keith Datu para sa kulang-kulang na tropa ni coach Yeng Guiao.

Muling nagpasiklab sa 26 puntos si Santi Santillan habang may 25 puntos si Gian Mamuyac subalit kulang pa rin tungo sa pagkawakas ng 2 sunod na panalo ng Elasto Painters para sa 2-2 kartada.

May kontribusyong ding tig-11 puntos sina Adrian Nocum at Datu para sa RoS na unang tumaob sa NLEX, 109-95, bago tambakan ang NorthPort, 113-96, at reigning All-Filipino champion na Meralco, 128-116.