VTV BD LA pasok sa AVC semis
MANILA, Philippines — Pinabagsak ng VTV Binh Dien Long An ng Vietnam ang Kaohsiung Taipower ng Chinese Taipei, 25-20, 17-25, 25-22, 28-26, para umabante sa semifinals ng 2025 AVC Women’s Volleyball Champions Cup kahapon sa PhilSports Arena sa Pasig City.
Lalabanan ng Binh Dien Long An ang mananalo sa quarterfinals match kagabi ng Petro Gazz at Baic Motor ng China sa agawan para sa finals spot.
Ang Vietnamese team ang ikatlong sumampa sa Final Four matapos ang Zhetysu ng Kazakhstan at Nakhon Ratchasima QminC ng Thailand na paglalabanan ang finals berth bukas.
Samantala, maluwag na tinanggap ni Creamline team captain Alyssa Valdez ang kanilang 15-25, 22-25, 16-25 kabiguan sa Nakhon Ratchasima sa quarterfinals noong Huwebes.
“It was actually a tall order din for us kasi we didn’t get to maximize or prepare so much for this tournament, but no excuses,” sabi ng three-time PVL Most Valuable Player.
Nauna nang natalo ang Cool Smashers sa Petro Gazz Angels sa nakalipas na PVL All-Filipino Conference championship series.
“Sana, iyon ang panghahawakan namin sa mga next tournament namin, may it be here in the Philippines representing Creamline, or representing the Philippines. Kung saan man, sana pagtibayan kami nito. Hopefully, madala namin ito even after the loss in the PVL. Magandang experience ito for all of us,” ani Valdez.
Sibak din ang PLDT sa Zhetysu ng Kazakhstan, 13-25, 22-25, 20-25, sa quarterfinals.
- Latest
