NorthPort tambak sa Blackwater
MANILA, Philippines — Nasungkit ng Blackwater ang una nitong tagumpay matapos hambalusin ang NorthPort, 120-98, sa 2025 PBA Philippine Cup kahapon sa Smart Araneta Coliseum.
Anim na players ang umariba sa double digits para sa balanseng atake ng Bossing tungo sa 1-2 kartada matapos unang sumemplang sa Magnolia, 106-84, at Converge, 111-80.
Nanguna sa opensa ng Blackwater ang second rookie pick na si Sedrick Barefield tampok ang 5 tres tungo sa 20 puntos sahog pa ang 3 rebounds, 4 assists at 3 steals.
Umalalay sa kanya sina Christian David at RK Ilagan na may 19 at 17 puntos sa pinagsama ring 5 tres, ayon sa pagkakasunod.
Nag-ambag naman ng 15, 14 at 10 puntos sina Richard Escoto, BJ Andrade at Troy Mallilin, ayon sa pagkakasunod pati na sina Mike Ayonayon at Bradwyn Guinto na may kontribusyong 9 at 7 puntos, ayon sa pagkakasunod.
Mula sa dikit na 48-47 iskor sa halftime, bumulusok ang Bossing sa 40 puntos sa third quarter at 32 puntos sa fourth quarter upang pakainin ng alikabok ang Batang Pier.
Umabante pa sa hanggang 27 puntos, 104-77, ang mga bataan ni coach Jeff Cariaso tungo bigating sa panalo.
Nagbalik-aksyon ang ace player na si Arvin Tolentino mula sa hip injury subalit nagkasya lang sa 15 puntos.
- Latest
