10 PH team members sa Tour of Luzon
MANILA, Philippines — Matutunghayan ang 10 miyembro ng PhilCycling men’s national team sa iba’t ibang koponan sa Tour of Luzon: Great Revival na papadyak sa Huwebes sa Paoay, Ilocos Norte.
Sina Southeast Asian Games medalist Ronald Oranza at Jan Paul Morales ang babandera sa International Cycling Union (UCI) continental team na Standard Insurance Philippines (SIP) sa eight-stage race na inihahandog ng Metro Pacific Tollways Corp. (MPTC) ng MVP Group at inorganisa ng DuckWorld PH.
Pumadyak ng dalawang bronze si Oranza sa Cambodia 2023 SEA Games at makakasama si Morales sa pagbandera sa SIP.
Sasalang din sina national team members Marcelo Felipe at Nichol Pareja (Victoria Sports Pro Cycling Team), Ruzzel Agapito (7-Eleven Click Roadbike Philippines), Joshua Pacsual (Excellent Noodles) at Julius Tudtud (DReyna Orion Cement).
Mamumuno naman sina Steven Tablizo at Andrei Deudor sa Philippines Under-23 Tom N Toms team sa Tour of Luzon na may opening ceremony sa harap ng world heritage site San Agustin (Paoay) Church kasama sina Department of the Interior and Local Government Secretary Juanito Victor “Jonvic” Remulla, PhilCycling at Philippine Olympic Committee president Abraham “Bambol” Tolentino.
Dadalo rin sina Ilocos Norte Governor Matthew Manotoc at Paoay Mayor Shiella Galano para tanggapin ang 119 riders mula sa 17 koponan kasama si MPTC Chief Regulatory Officer Arrey Perez na magbibigay ng opening remarks.
- Latest
