Lady Stags sumosyo sa No. 4
MANILA, Philippines — Sumosyo sa No. 4 spot ang San Sebastian College-Recoletos matapos ang 21-25, 25-23, 25-17, 18-25, 15-13 panalo sa San Beda University sa NCAA Season 100 women’s volleyball tournament kahapon sa Jose Rizal University Gym sa Mandaluyong City.
Kumana si Juna May Gonzales ng 20 points mula sa 17 attacks, dalawang service ace at isang block para sa Lady Stags.
Bumakas si Christina Marasigan ng 17 markers, habang 13 points ang ambag ni Kristine Joy Dionisio para sa kanilang 4-2 record katabla ang Mapua Lady Cardinals.
Lamang ng dalawang puntos ang Lady Red Spikers, 11-9, sa deciding fifth set at lumapit sa pagsilo ng panalo nang makaungos pa rin sa bandang dulo, 13-12.
Pero umiskor ang Baste ng tatlong sunod na puntos upang payukuin ang San Beda at ibaon sa 0-6 karta.
Inirehistro ni Reyann Canete ang 26 points mula sa 20 kills, apat na service aces at dalawang blocks pero kinapos pa rin para itaguyod sa panalo ang Lady Red Spikers.
Samantala, dinungisan ng Arellano University ang malinis na karta ng Letran, 25-20, 22-25, 25-23, 25-20, sa unang laro sa likod nina Laika Tudlasan at Samantha Gabrielle Tiratira.
Umiskor si Tudlasan ng 19 points galing sa 18 kills at isang service ace para sa 3-3 marka ng Lady Chiefs.
Ito ang unang kabiguan ng Lady Knights matapos magposte ng malinis na 5-0 kartada katabla ang nagdedepensang St. Benilde Lady Blazers.
- Latest
