Cool Smashers, HD Spikers tutok sa PVL quarterfinals

MANILA, Philippines — Magsisimula na ang Premier Volleyball League (PVL) All-Filipino Conference quarterfinals bukas tampok ang mga teams na mag-uunahan para makahirit ng tiket sa semis.

Nakasentro ang atensiyon sa top teams Creamline at Cignal lalo pa’t knockout system ang ipatutupad sa quarterfinals na magsisimula bukas.

Haharapin ng Cool Smashers ang Nxled Chameleons habang titipanin naman ng HD Spikers ang Galeries Tower Highrisers sa kani-kanyang laban.

Lamang ang Creamline at Cignal sa papel.

Nanaig ang Cool Smashers sa Chameleons sa elimination round kung saan nagtala ang defending champions ng 50 attacks kumpara sa 26 lamang ng Nxled.

Nakaabante rin ang Cool Smashers sa blocking departement bitbit ang 6-2 bentahe habang may apat na aces din itong naitala.

Aminado si Creamline team captain Alyssa Valdez na marami pang dapat ayusin sa kanilang tropa lalo pa’t nakatikim ito ng unang kabiguan sa kamay ng PLDT.

“We’ll take it one game at a time. Definitely, I think one of the skills na na-improve ng halos lahat would be the system and the blocking eh. I guess we’re gonna work on our counter-attacks pa rin and basics, disiplina most definitely sa sistema namin,” ani Valdez.