Gilas sasalang agad sa ensayo sa Calamba

MANILA, Philippines — Balik-ensayo na ang Gilas Pilipinas upang mabilis na makuha ang che­mistry nito bago lumaro sa 2nd International Friendly Basketball Championship na magsisimula sa Pebrero 14 sa Doha, Qatar.

Ang Doha tournament ay bahagi ng preparasyon ng Gilas Pilipinas para sa FIBA Asia Cup Qualifiers final window.

Nasa Inspire Sports Academy sa Calamba, Laguna na ang Gilas Pilipinas para sumailalim sa conditioning at ilang scrimmages kasama ang buong c­oaching staff sa pangunguna ni head coach Tim Cone.

Maingat ang c­oaching staff upang maiwasan ang anumang injury lalo pa’t galing sa PBA Season 49 Commissioner’s Cup quarterfinal series ang ilang players.

Kabilang na rito si naturalized player Justin Brownlee na siyang import ng Barangay Ginebra.

Kaya naman pinag-aaralan na ni Cone ang magiging game plan nito para hindi mabugbog ng husto si Brownlee.

“It’s gonna be tough. He’s going to Doha, and playing those games in bet­ween. That will keep him sharp but we have to make sure not to overuse him, so we’re really planning for load management with Justin,” ani Cone.

Maliban kay Brownlee, magiging salitan din sina AJ Edu at eight-time PBA Most Valuable Player June Mar Fajardo.

Kinuha ng Samahang Basketbol ng Pilipinas sina RJ Abarrientos at Ralph Cu para makasama ng Gilas sa training camp sa Calamba.