Gazz Angels sa finals
MANILA, Philippines — Lumipad ang Petro Gazz pa-finals ng 2023 Premier Volleyball League (PVL) All-Filipino Conference matapos kaldagin ang PLDT High Speed Hitters, 25-17, 25-23, 25-15, sa knockout semifinals kahapon sa MOA Arena sa Pasay City.
Makakasagupa ng Gazz Angels ang Creamline Cool Smashers sa best-of-three finale simula sa Linggo para sa kanilang ikaapat na PVL championship duel.
Hangad ng Petro Gazz ang ikalawang sunod na korona matapos hatawin ang Reinforced Conference title noong nakaraang taon kasabay ang tangkang bawi sa Creamline na tumalo sa kanila noong nakaraang All-Pinoy tourney.
Nauna nang umabante sa finals ang Creamline matapos walisin ang F2 Logistics sa semis, 26-24, 18-25, 25-22, 25-15 at 25-22, 25-23, 25-16.
Sa panig ng Gazz Angels, kinailangan pa nila ng isang laro matapos makahirit ng rubber match ang High Speed Hitters sakay ng 14-25, 25-23, 25-14, 25-15 panalo sa Game Two.
Wagi ang Petro Gazz sa Game One, 22-25, 25-19, 25-21, 25-18.
Bumida sa matamis na higanti ng Petro Gazz sina MJ Phillips, Jonah Sabete at Grethcel Soltones na pumalo ng 15, 13 at 12 points, ayon sa pagkakasunod.
May 9 points si Rem Palma kasunod ang 7 markers si Aiza Maizo-Pontillas, habang sumungkit ng 11 digs at 11 receptions si Soltones.
Kumumpas sa straight-sets na atake ng mga bataan ni coach Oliver Almadro si Djanel Cheng na may 17 sets at umariba sa 17 digs ang liberong si Cienne Cruz.
“We always challenge our players. They accepted the challenge and acknowledged that they can do it. Yesterday pa lang, I saw fierceness in their eyes. They really wanted to bounce back,” wika ni Almadro.
- Latest
