Heat sumosyo sa top spot sa East
CHARLOTTE, N.C. — Iniskor ni Kyle Lowry ang 12 sa kanyang 25 points matapos ang regulation para akayin ang Miami Heat sa 111-107 double overtime win kontra sa Charlotte Hornets.
Nagdagdag si Duncan Robinson ng 21 points at tumipa si Jimmy Butler ng 15 points, 10 rebounds at 8 assists para sa pagsosyo ng Heat (38-21) sa Chicago Bulls (38-21) sa liderato ng Eastern Conference papasok sa All-Star break.
Ito ang ikaanim na panalo ng Miami sa huli nilang pitong laro.
Sa second overtime ay nakadikit ang Charlotte sa 107-109 mula kay Miles Bridges kasunod ang backdoor layup ni Lowry at supalpal ni Miami center Bam Adebayo sa 3-point attempt ni Kelly Oubre Jr. para selyuhan ang kanilang panalo.
Tumapos si Bridges na may 29 points at 11 rebounds.
Sa Milwaukee, nagposte si Joel Embiid ng 42 points, 14 rebounds at 5 assists sa 123-120 pagtakas ng Philadelphia 76ers (35-23) sa nagdedepensang Bucks (36-24).
Kumolekta si Giannis Antetokounmpo ng 32 points, 11 rebounds at 9 assists para sa Milwaukee.
Sa iba pang laro, pinadapa ng Washington Wizards ang Brooklyn Nets, 117-103; dinaig ng Dallas Mavericks ang New Orleans Pelicans, 125-118; at tinalo ng Los Angeles Clippers ang Houston Rockets, 142-111.
- Latest
