Bea, pakakasalan na ng negosyante?!

MANILA, Philippines — Wow, dadalo pala si Bea Alonzo sa event ng sinasabing karelasyon niya ngayon na si Vincent Co bukas, Friday.

Itatampok ng Puregold ang talentong Pinoy kaugnay ng pangako nitong kumonekta sa kabataang Pilipino, sa mga nagmamahal sa musika, at mga araw-araw na nanga­ngarap at nakikita ang musika bilang ritmo ng buhay sa pagbabalik ng Nasa Atin Ang Panalo na mas pinalaki at pinabongga.

May mga bagong miyembro rin daw pamilya ng Puregold, tatlo sa mga pinakamaingay na pangalan sa lokal na industriya ng musika—G22, Skusta Clee, at KAIA.

So si Bea kaya, magiging miyembro na?

Samantala, naglabas naman ng kantang Sari-Saring Kwento si Skusta Clee, isa sa pinakaimpluwensyal na pangalan sa Pinoy hip-hop, kasama ang talentadong rapper din na si Flow G. Tampok sa kanta ang matatalas na mga linya at mensaheng paniguradong tatama sa mga Pilipinong tagapakinig.

Dapat ding markahan ng mga nagmamahal sa musika at mga mamimili sa nasabing supermarket ang Hulyo 5, 2025 dahil ito ang araw na titingkad ang Philippine Arena dahil sa Puregold OPMCON 2025. Mapapanood dito ang pagtatanghal ng SB19, BINI, G22, KAIA, Skusta Clee, Flow G, at Sunkissed Lola. Maituturing na pinakamalaking kaganapan sa OPM ngayong taon.

Abangan ang unang pagbebenta ng tiket sa Mayo 16 at 17 sa Tindahan ni Aling Puring Sari-Sari Store Convention sa World Trade Center sa Pasay City.

Well, bukod sa nabanggit na event, ina­abangan nga ng lahat si Bea na diumano’y noon pa nililigawan ng negosyante, noong magkarelasyon pa diumano sina Bea at Dominic Roque.

Marrying age na raw si Mr. Co kaya ‘wag magulat kung mauuwi sa kasalan ang relasyon nila at magiging reyna na si Bea ng Puregold.