Inamin kung ba’t nag-swak...Marco, ayaw munang ibalandra ang relasyon kay Cristine

Na-corner ng entertainment press si Marco Gumabao tungkol sa rumored relationship nila ni Cristine Reyes sa mediacon ng TV5’s new comedy series na Kurdapya.

Lately nga kasi ay natsitsismis na may relasyon sila dahil na nga sa lagi silang spotted na magkasama. Nakita silang magkasamang nagbakasyon sa Siargao kamakailan at may nakakita pa sa kanilang magka-holding hands sa Makati.

Ayon kay Marco, ayaw raw muna niyang bigyan ng label ang relasyon nila ni Cristine.

“Basta, you’ll find out when the time is ready,” he said.

Sa tingin niya ay hindi pa right time ngayon?

“Hindi naman sa hindi pa right time. Pero siguro, we’re just enjoying ‘yung time namin na wala munang nakikiusyoso,” sagot niya.

“Kasi, the reason why I’m very private when it comes to love life is because kapag nalaman ng tao for example na you’re dating this woman, maraming makikigulo, maraming eepal, maraming maninira. So, ‘yun ‘yung ayoko.

“And at the same time, happy naman kami sa tahimik na buhay,” dagdag pa ng aktor.

Pero nilinaw rin niyang hindi naman sila nagde-deny.

“Wala naman kaming dine-deny. Hindi naman kami nagde-deny ni Cristine. I mean, of course, napag-usapan na rin namin ‘to ‘di ba? And we’re not denying anything.

“Unang-una, wala kaming tinatapakan, we’re both single. So, parang mas masarap lang na private lang,” he said.

At hindi rin daw sila nagtatago kaya nga nakikita rin sila sa public places.

“Kami siguro ni Cristine, kaya siguro nagki-click  nagki-click din kami kasi outside of work, outside of the cameras, we’re just 2 normal people who enjoy going out, eating out, like going to public places, going to the mall, ganyan.

“Hindi kami ‘yung nagtatago, ‘yung nagma-mask, ta’s naka-shades inside the mall, wala. Kung baga, if people see us, then, people see us and hindi kami nagtatago, pero hindi rin namin binabalandra,” aniya.

“What we have now is special, I can say. Ayoko munang magsabi ng mga label-label na ganyan,” saad pa ng aktor.

Basta raw happy silang dalawa at wala naman daw silang tinatapakang tao since pareho naman daw silang single.

Samantala, si Marco ang leading man ni Yassi Pressman sa Kurdapya at masaya siya na finally ay nakapareha na niya ang aktres na matagal na niyang gustong makatrabaho.

“I remember before when I recently transferred to Viva, ang tanong sa akin nila was ‘sino ang gusto mong makapareha?’ One of my answers was really si Yassi talaga,” kwento ni Marco.

May mga projects na raw sana silang gagawin noon pero laging hindi natutuloy. Kaya naman thankful siya na finally ay natuloy na rin sila sa Kurdapya.

Mula sa direksyon ni Easy Ferrer, napapanood ang Kurdapya sa TV5 tuwing Sabado 6 p.m., may catchup episodes din sa Sari Sari channel tuwing Linggo 8 p.m.. Kasama rin sa twintastic comedy series sina Ryza Cenon, Nikko Natividad at marami pang iba.