^

Banat Palaro

Tatum midominar, Celtics gipabugnaw ang Lakers

Emmanuel B. Villaruel - Banat
Tatum midominar, Celtics gipabugnaw ang Lakers
Si Jayson Tatum sa Boston Celtics mi-dunk sa bola atol sa ilang duwa batok sa Los Angeles Lakers sa NBA kagahapong adlawa didto sa TD Garden sa Boston, Massachusetts.
Agence France Presse

CEBU, Philippines — Si Jayson Tatum mipaulbo og 40 puntos sa dihang gipakgang sa Boston Celtics ang walo ka sagunson nga daog sa Los Angeles Lakers, 111-101, atol sa kulbahinam nga sangka tali sa mga higanteng koponan sa NBA kagahapong adlawa didto sa TD Garden sa Boston, Massachusetts.

Sikit kaayo ang kumbati sa duha ka dekalibreng puwersa sa wala pa ang Celtics miposte og kuwatro puntos nga bentaha sa halftime.

Human sa mubo nga pahuway, ang Celtics milusad og nagkayong opensiba sa ikatulong kuwarter diin ilang gilabhan ang Lakers, 29-13, nga nakapaburot sa ilang labaw ngadto na sa 20 puntos, 87-67, padung sa pinal nga 12 minutos sa aksiyon.

Luyo sa pagratsada ni Luka Doncic, ang Lakers nakasikit ngadto na lang sa kuwatro puntos, 99-95, apan mao na kadto ang katapusan nilang utong gumikan kay ang Celtics milansang og duha ka sagunson nga 3-pointers aron tuldokan ang mahinungdanon nilang daog.

Gawas sa eksplosibo niyang opensa, si Tatum milangkat sab og 12 ka rebounds ug mipasa og walo ka assists.

Si Jaylen Brown midugang og 31 puntos samtang sila si Al Horford ug Derrick White nagkumboya'g 24 puntos alang sa Celtics nga nagkupot na karon og 46-18 nga baraha.

Si Doncic mihipos og 34 puntos samtang si James mitali og 22 puntos sa wala pa mibiya sa ikaupat nga kuwarter tungod kay dunay gihambin nga angol dapit sa iyang bugan.

Tungod sa ilang kapildhan, ang Lakers natagak sa ikatulong puwesto sa Western Conference bitbit ang 41-22 rekord.

Didto sa Chase Center sa San Francisco, California, ang Golden State Warriors mipakaging sa Detroit Pistons, 115-110, alang sa ikaupat nilang sunod-sunod nga daog.

Si Stephen Curry mi-iskor og 31 puntos samtang si Jimmy Butler mitampo og 26 puntos, siyam ka rebounds ug lima ka assists.

Ang krusyal hinoon nga tres sa beteranong si Draymond Green sa katapusang 35 segundos maoy nahimong yawi sa Warriors ngadto sa makapaisa'g balahibo nga kadaogan.

Si Curry mipasud dayon og upat ka sagunson nga free throws sa hilimaytong segundos sa dihang ang Warriors miinat sa ilang marka ngadto sa 36-28. Ang Detroit nahagsa sa 35-29.

Sa ubang mga duwa, si Paolo Banchero mihipos og 29 puntos sa dihang gibugha sa Orlando Magic ang Milwaukee Bucks, 111-109, si Trae Young mikadlit og 36 puntos aron pangulohan ang Atlanta Hawks ngadto sa 120-118 nga pagkawras sa Indiana Pacers, samtang sila si Dillon Brooks ug Alperen Sengun nagkumbinar og 47 puntos sa dihang gipulbos sa Houston Rockets ang New Orleans Pelicans, 146-117.

BOSTON CELTICS

  • Latest
Latest
Latest
abtest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

Get Updated:

Signup for the News Round now

FORGOT PASSWORD?
SIGN IN
or sign in with
-->