CEBU, Philippines — Si Karl-Anthony Towns mipaulbo og 40 puntos uban ang 12 ka rebounds, lima ka assists ug tulo ka steals sa dihang gipayaka sa New York Knicks ang mainit nilang karibal nga Indiana Pacers, 128-115, sa NBA kagahapong adlawa didto sa Gainbridge Fieldhouse sa Indianapolis, Indiana.
Misalida sab si Josh Hart uban ang 30 puntos samtang si Miles McBride way sipyat sa upat niya ka 3-pointers sa gitampo niyang 15 puntos alang sa Knicks, nga nagpabilin sa ikatulong dapit sa Eastern Conference standings bitbit ang 35-18 rekord.
Si Pascal Siakam mikadlit og 24 puntos sa Pacers, nga natagak sa 29-23 apan ikaupat gihapon sa East.
Didto sa Philadelphia, ang 76ers nasugamak sa ikaupat nga sunod-sunod nga higayon human giparotan sa Toronto Raptors, 106-103.
Ang Raptors nagtangag na karon og 17-37 nga baraha samtang ang Sixers nalansang sa ika-11 nga puwesto sa East uban ang 20-33 nga marka.
Sa laing bahin, ang Detroit Pistons miihaw sa Chicago Bulls, 132-92.
Si Malik Beasley miposa og pito ka tres sa iyang 24 puntos samtang si Cade Cunningham midugang og 20 puntos alang sa Pistons nga miinat sa ilang rekord ngadto sa 28-26. Ang Bulls nadakin-as sa 22-32.
Sa aksiyon didto sa West, ang Memphis Grizzlies mipaksit sa Phoenix Suns, 119-112.
Sila si Ja Morant ug Desmond Bane nagkumbinar og 46 puntos alang sa Grizzlies.
Napukan man tuod ang Suns apan dunay konsolasyon si Kevin Durant nga nahimong ikawalo pa lamang nga player sa kasaysayan sa NBA nga nakapupo og 30,000 puntos sa ilang karera.