CEBU, Philippines — Giablihan ni Luka Doncic ang bag-ong panid sa iyang karera didto sa Los Angeles pinaagi sa pag-iskor og 14 puntos sa dihang gilampornas sa Lakers ang Utah Jazz, 132-113, sa NBA kagahapon didto sa Cryto.com Arena.
Ang 25-anyos nga si Doncic, nga bag-ohay pang gi-trade sa Dallas Mavericks ngadto sa Lakers sa labing makapakurat nga pagbinayloay og players sa kasaysayan sa NBA, miduwa sa unang higayon sukad sna-angol ang iyang bagtak niadtong Disiembre.
Nalimitahan ang iyang oras sa korte ngadto lamang sa 24 minutos kay gusto ni Lakers head coach J.J. Redick nga tarongon paghikutar ang iyang panglawas.
Adunay makuyaw nga sitwasyon kadiyot sa unang kuwarter sa dihang si Doncic nanginahanglan nga matambalan sa wala niyang bagtak sa wala pa kini misud sa ilang locker room. Apan ang five-time All-Star mibalik sa korte sa wala pa mibiya sa hingpit sa naghinapos nag bahin sa ikatulong kuwarter diin kontrolado na kaayo sa Lakers ang duwa uban ang 93-69 nga labaw.
Sa mubo niyang panahon sa korte, mipakita hinoon si Doncic og kalibre nga siya mao ang bag-ong nawong nga mogiya sa Lakers sa umaabot.
Mi-iskor siya sa labing una niyang puntos isip usa ka Laker pinaagi sa usa ka layo kaayong 3-pointer sa unang kuwarter ug sa kanunay nagkasinabot sila ni LeBron James, nga mihipos og 24 puntos.
Ang Lakers ikalima karon sa Western Conference bitbit ang 32-19 rekord samtang ang nangiwit nga Jazz natagak sa 12-40.
Sa ubang mga resulta, si Evan Mobley miharos og 28 puntos, 10 ka rebounds, unom ka assists ug upat ka blocks sa dihang ang Cleveland Cavaliers nakasugakod sa gipabutong 44 puntos ni Anthony Edwards aron pahilomon ang Minnesota Timberwolves, 128-107, samtang si Jason Tatum mipatuasik og 33 puntos aron pangulohan ang Boston Celtics ngadto sa 103-85 nga paglampaso sa Miami Heat.