CEBU, Philippines — Wala igkita sa Sugbuanong boksidor nga si Rodex "The Tank" Piala ang iyang pamilya sud sa dul-an duha ka bulan kay gitrangkahan niya ang iyang kaugalingon sa usa ka hugtanong pagbansay-bansay didto sa ARQ Gym.
Ang tanan niyang sakripisyo ug kakugi nagbunga.
Si Piala mipakita sa labing nindot nga salida sa iyang karera sa dihang gipalayas niya si Chinese champion Yeerjialahasi Laayibieke sa trono niini pinaagi sa unanimous decision nga kadaogan aron sakmiton ang
Word Boxing Organization (WBO) Oriental super featherweight belt atol sa labing unang "Binukbukay sa Sugbo" niadtong Sabado sa gabii, Pebrero 8, didto sa Nustar Resort and Casino Convention Center.
Human sa makutas nga 12 ka hugna nga aksiyon, si Piala nangharos sa scorecards sa tulo ka mga judges sa iskor nga 117-110, 116-111 ug 115-112 aron hatagan ang iyang kaugalingon og maanindot nga regalo nga iyang gihandum kay nagselebrar man siya sa ika-30 nga sumad sa adlaw niyang natawhan bisperas sa away.
"Para ni sa akong pamilya ug mga anak ang tanan. Sila akoang gihuna-huna samtang naa ko sa ring," matud pa ni Piala, nga mibulsa og P100,000 nga bonus gikan sa Dr. Winley Dela Fuente sa OX KBDF Gaming, nga maoy nagpasiugda sa maong promosyon, tungod sa impresibo niyang performance.
"Gipaningkamotan gyud nako ang tanan kay grabi kaayo ang suporta sa akong manager nga si sir Jason Arquisola ug sa iyang asawa nga si mam Eva. Gusto nako nga mahakatag og dungog ug mailhan ang ARQ Stable mao nang nalipay kaayo ko nga ako ning nabuhat," dugang pa ni Piala.
Human gisukod ang abilidad sa iyang kontra sa unang hugna, si Piala nagsugod pagpatupa og mga kalkuladong mga suntok ngadto sa ulo ni Laayibieke sa ikaduhang hugna.
Si Laayibieke milusad sa agresibo niyang ataki sa sunod nga mga hugna apan si Piala epektibong mibalhin sa dagan sa away pabor kaniya sa ikaunom nga hugna sa dihang gipadagayday niya ang dugo sa ilong sa bisitang Tsinoy tungod sa hait niyang mga counter-punch ug solidong kombinasyon.
Gitiwasan ni Piala si Laayibieke human kini niya gipalukapa sa tunga-tungang bahin sa ika-12 ug katapusang hunga gamit ang makusog nga right straight ngadto sa ulo.
"Dili siya klase sa boxer nga masayon-sayon kay grabi siya ka-agresibo ug kalig-on," dason pa ni Piala kabahin ni Laayibieke. "Pero wala lang pud nako gi-down akoang kaugalingon. Ako lang ipakita sa kapwa nako mga Cebauno kon unsa ta kaisog ug dili sab basta-basta ang ato abilidad."
Dalaygon nga pamawi ang nakab-ot ni Piala, nga nahagba pinaagi sa unanimous decision sa mga kamot ni WBO Asia Pacific featherweight champion Kenji Fujita atol sa una niyang title fight niadtong Hunyo 1 sa miaging tuig didto sa Korakeun Hall sa Tokyo, Japan.
Si Piala nagkupot na karon og 11-1 rekord uban ang 1KO, samtang si Laayibieke natagak sa 10-3 uban ang 7KOs.