CEBU, Philippines — Usa ka eksplosibong pasundayag nga naglangkob og tulo ka regional championship bouts sa World Boxing Organization (WBO) ang mahitabo karon nang gabii (Sabado, Pebrero 8) diha sa Nustar Resort and Casino Convention Center.
Sa main event sa giatngan nga "Binukbukay sa Sugbo" fight card nga gipasiugdahan sa OX KBDF Gaming ni Dr. Winley de la Fuente, ang Koreanong si Jong Seon Kang (20-1, 11KOs) modepensa sa trono isip WBO Global featherweight champion batok sa Hapon nga challenge nga si Ryuto Owan (13-1, 8KOs).
Sa dili pa magsungag sila si Kang ug Owan, ang Sugbuanong si Rodex "The Tank" Piala (10-1, 1KO) sa ARQ Stable mokatkat sa ring aron hagiton si WBO Oriental super featherweight champion Yeerjialahasi Laayibieke (10-2, 7KOs) gikan sa Beijing, China apan mo-away ubos sa PMI Bohol Stable.
Gawas nga nagtinguha nga makabawi sa miagi niyang kaparotan sa mga kamot sa way pildeng WBO Asia Pacific featherweight champion nga si Kenji Fujita niadtong Hunyo 2024, si Piala nanghinaut nga hatagan ang iyang kaugalingon og uwahing regalo kay nagselebrar man siya sa ika-30 nga sumad sa adlaw niyang natawhan bisperas sa ikaduha away alang sa titulo.
"Mapasalamaton ko sa akoang manager nga si sir Jason Arquisola ug sa akoang promoter nga si mam Eva Marie Arquisola sa paghatag nila nako og opportunity nga maka-away balik og title fight sa lugar nako nga natawhan," matud pa ni Piala nga lumad gikan sa dakbayan sa Talisay City.
"Para ni sa akoang pamilya. Wala nako sila igkita sud sa duha na ka bulan kay nangandam ko pag-ayo sa akoang training sa gym," dugang pa ni Piala. "Ako ipakita sa kadaghanan og unsa ko. Buhaton nako tanan sulod sa ring para tagaan ko sa Ginoo og nindot nga regalo."
Sa laing sangka alang sa korona, si two-time WBO regional titlist Genesis "Azucal" Servania (35-4, 16KOs), nga toa na karon magbase sa Vietnam, mosakbang batok ni Aketelieti Yelejian (9-4-1, 2KOs) sa Shenzhen, China alang sa bakanting WBO Oriental lightweight belt.
Sa makalingaw nga undercard, si kanhi world minimumweight champion Vic "Vicous" Saludar (25-6, 15KO) makigharong ni Roldan Sasan (8-6-1, 3KOs). Magpinaksitay sab sila si Jason Balajadja vs Vergil Deguma, Rafie Jamero vs Yulie Hindoy, ug Tristan Jay Racho vs Aubrey Silot.
Ang presyo sa tickets nakantidad og P2,900 (general admission), P5,700 (gold), P8,000 (VIP) ug P11,300 (ringside).