CEBU, Philippines — Sila si Jayson Tatum ug Derrick White mibandera sa defending champion Boston Celtics ngadto sa 112-105 nga pagbugha sa Cleveland Cavaliers sa NBA kagahapong adlawa didto sa Rocket Mortgage Fieldhouse sa Cleveland, Ohio.
Si Tatum mikadlit og 22 puntos samtang si White miposa og unom ka 3-pointers sa iyang 20 puntos alang sa Celtics nga wala na molingi pa sukad sila miposte og 20 puntos nga labaw sa ikaduhang kuwarter.
Balanse kaayo ang opensiba sa Celtics diin sila si Kristaps Porzingis ug Jaylen Brown nagkumboya'g 35 puntos.
Si Donovan Mitchell maoy nangu sa pilderong Cleveland uban ang 31 puntos.
Sa laing duwa, si Kyrie Irving mipabuhagay og 34 puntos apan dili kini igo aron pugngan ang Dallas Mavericks nga makatilaw og 118-116 nga kaparotan sa mga kamot sa Philadelphia 76ers nga nalagsik sa pagbalik ni Joel Embiid.
Si Embiid, nga wala makaduwa sa miaging bulan tungod kay nayayay ang iyang tiil ug tuhod, nagparamdam dayon sa iyang pagtikang og balik sa korte uban ang triple-double nga 29 puntos, 11 ka rebounds, ug 10 ka assists.
Wala sab magpabitin si Tyrese Maxey nga mipupo og 33 puntos, 13 ka assists ug upat ka rebounds alang sa Sixers.
Didto sa Toronto, si Karl-Anthony Towns mikulit og 27 puntos ug milangkat og 20 ka rebounds aron ituboy ang New York Knicks ngadto sa 121-115 nga pagpakaging sa Raptors.
Didto sa New York,si D'Angelo Russell milansang og tres sa pinal nga tres segundos aron aswaton ang Brooklyn Nets ngadto sa 99-97 nga pagpakugang sa Houston Rockets.