CEBU, Philippines — Ang NorthPort Batang Pier ug TNT Tropang Giga naglaraw nga makaangkon og awtomatik nga luna sa semifinals sa ilang pakigsangka batok sa managlahing kontra sa PBA Commissioner's Cup quarterfinals karong adlawa (Huybes, Pebrero 6) didto sa Ninoy Aquino Stadium sa kaulohan.
Harongon sa Batang Pier ang Magnolia Hotshots sa pasiunang duwa sa alas-5 sa hapon, samtang ang TNT mosakbang batok sa Eastern Hong Kong sa alas 7:30 sa gabii.
Ang Batang Pier ug ang Tropang Giga parehong nagkupot og twice-to-beat advantage tungod sa pag-okupar nila sa nag-unang duha ka puwesto human sa eliminasyon.
Kini nagpasabot nga nanginahanglan lamang sila og usa ka daog aron moabante sa sunod nga hugna sa torneyo, ang best-of-three semis.
Kon ugaling kon modaog ang ilang kontra, duwaon ang tinagakay nga duwa karong Sabado, Pebrero 8.