Palpak sa LTO

Nindot ang gihimo sa kadagkoan sa Land Transportation Office (LTO) kay giuswag nila ang estriktong pagpanakop sa mga drayber sa mga sakyanan nga padayong migamit og temporary plate numbers.

Gigamit gyud ni LTO Chief Vigor Mendoza ang iyang utok kay nganong pangdakpon man tawon ang mga driver sa mga sakyanan nga way mga original nga plaka. Ila diay’ng sala nga way original plate ang sakyanan?

Ang LTO maoy sad-an niini ug angay pa gani nga mobayad unta sa kahasol ngadto sa mga motorista, mga magbubuhis nga nagubayad og rehistro apan wa hatagi dayon og plaka.

Kaniadto, ang mga motorista nga moparehistro pabayron sa LTO og sticker fee nga ipapilit unta sa plate numbers, apan bisan og mibayad pa, ang resibo butangan lang og “Registered but no available sticker.”

Dakong tinonto ang ilang gihimo kay pabayron unya wa diay sticker. Masakripisyo pa diha sa mga karsada kay parahon man sa mga LTO road law enforcers kay magtoo nga wa marehistro ang sakyanan.

Maayo gani kay gihunong na ang pagkolekta og sticker fee. Kaniadto, gipabayad sab ko og P450 nga replacement fee kuno kay ilisan ang plaka, kanang itom na ang kolor sa mga letra ug numero.

Matud pa nga 45 ka adlaw ra moabot na ang bag-ong plaka, apan milabay na lang ang tulo ka tuig, wa gyuy plaka nga miabot. Hain na man ang gibayad nako nga P450?

Dili kay ako ra ang gihimoan niini, daghan mi, sa tibuok nasud. Sa laktud nga pagkasulti, naghalhal lang ang mga nagdumala kaniadto sa LTO nga wa magtagad sa ilang kakuwangan.

Balikon nako, nganong dili man kamo magpahimo og daghang plaka ug ihatag kini daan ngadto sa mga regional offices sa LTO, aron nga inigsugod na sa tuig, makahatag dayon sila’g plaka sa mga moparehistro og bag-ong sakyanan?

Bisan gani kanang pagpanakop sa mga driver niadtong sakyanan nga giisyuhan na og plaka apan wa lang dayon makuha diha sa LTO, dili kana maayong estriktohon sa pagpatuman.

Timan-i nga ang usa ka tag-iya’g sakyanan motaud gyud dayon sa plaka kon anaa pa. Apan kamo maoy sad-an kay sa pagparehistro nila, wa mo makahatag dayon og plaka apan gikolektahan na ninyo og kompleto nga bayad ang tag-iya sa sakyanan.

Mag-estrikto gani ta sa pagpatuman sa mga lagda, hunahunaa usab pag-ayo kon natuman ba ninyo ang inyong katungdanan. Bisan ang mga amigo nako sa LTO dinhi sa Sugbo, mitug-an nga susama kami og baruganan apan nagpakahilom lang sila kay mahadlok.

Pareho nianang pakuhaon og online-examination ang moaplay og lisensya, nagtoo mo nga ang miaplay og lisensya mao gyud ang mihimo sa pagtubag sa mga questionaires?