UV Lancers misakmit og laing grand slam mibira sa ika-16 nga korona sa CESAFI

CEBU, Philippines — Ang University of the Visayas (UV) Green Lancers mi-sweep sa University of Cebu (UC) Webmasters sa ilang best-of-three finals uban ang impresibong 72-55 nga kadaogan sa Game 2 aron pagkab-ot og laing Grand Slam nga kadungganan sa Cebu Schools Athletic Foundation, Inc. (CESAFI) Season 24 basketball tournament niadtong Sabado, Disiembre 7, didto sa Cebu Coliseum.

Mao kadto ang ikaduhang three-peat sa UV ubos sa pagtimon ni coach Gary Cortes, nga migiya sab sa Lancers ngadto sa tulo ka sagunson nga titulo niadtong 2016 ngadto sa 2018.

Si Cortes aduna na karoy unom ka tropeyo sa kampiyonato sud sa walo ka ka sunod-sunod niyang pagtikang sa Finals sukad siya gitudlo nga coach sa Lancers niadtong 2015.

Sa kinatibuk-an, ang Lancers mibulsa sa ika-16 nilang korona aron pagsemento sa ilang estado isip labingh daogan nga koponan sa 24 ka tuig nga kasaysayan sa CESAFI.

Si coach Elmer "Boy" Cabahug ang nagpanday sa lig-on kaayong pundasyon sa dinastiya sa UV sa dihang iyang gituboy ang Lancers ngadto sa siyam ka sunod-sunod nga kampiyonato gikan sa unang season sa CESAFI niadtong 2000 ngadto sa 2009.

Karon ubos sa paggiya ni Cortes, nagpadayon ang maong tradisyon sa Lancers human gipiog ang Webmasters sa Finals sa ikatulong higayon.

"Una, pasalamat ko sa Ginoo nga naghatag kanatong tanan sa kusog ug kabaskog aron makigbisog adlaw-adlaw ug sa kadaogan," matud pa ni Cortes. "Ang nakapa-champion namo ang amo ra gyung determinasyon, hard work ug championship experience kay ang UC di gyud basta basta nga kontra sa finals."

Si Raul Gentallan ang bida sa Lancers hinungdan sa pagbayaw kaniyang Finals Most Valuable Player (MVP).

Si Gentallan, nga mihipos og 10 puntos, lima ka rebounds, upat ka assists, usa ka steal ug usa ka block, giduyogan sa Mythical 5 sa teammate niyang si AJ Sacayan, Elmer Echavez sa University of San Jose-Recoletos (USJ-R) Jaguars, Serge Gabines sa Benedicto College (BC) Cheetahs ug Ray Charles Libatog sa UC Webmasters.

Ang season MVP sa miaging tuig nga si MVP Kent Ivo Salarda mitagak og 19 puntos uban ang upat ka rebounds ug tulo ka steals samtang si Paul John Taliman mipupo og 16 puntos, lima ka rebounds ug duha ka steals alang sa Lancers, nga miabante lamang og usa ka lugas sa halftime, 34-33.

Apan ang Lancers mikaratil ngadto sa 55-45 bentaha human sa tulo ka kuwarter sa wala pa gipaburot ang ilang labaw ngadto na sa 20 puntos, 72-52, sa 3-pointer ni team captain Jimpaul Amistoso sa hilimatyong segundos nga maoy nagtuldok sa bulawanon nilang kalamposan.

"In behalf of the UV Green Lancers, daghang salamat sa Gullas family and to the entire Visayanian community. The success we achieved wouldn't have been possible without their unwavering support," padayag pa ni Cortes.

Si Fil-Am guard Jepherson Nonol maoy bugtong player nga mihipos og double figures sa sa UC uban ang 12 puntos, upat ka rebounds, usa ka assist ug usa ka steal alang sa Webmasters, nga napakyas na sab sa ilang misyon pagbisbis sa 13 ka tuig nilang huwaw sa titulo.