4-point shot sa PBA ‘di pinaboran nina Sotto, Ramos

MANILA, Philippines —  Kung sina Kai Sotto at Dwight Ramos ang tatanu­ngin, hindi sila pabor sa four-point shot na kasalukuyang ipinatutupad sa PBA Season 49 Governors’ Cup.

Para kay Sotto, mas nanaisin nito na manatili sa dating nakagawian na three points para sa mga long-range shot. At kung siya ang tatanungin, gagawin na lamang nitong mas malayo ang three-poiint area.

“I don’t think it’s just right. I think if I was the commissioner, I wouldn’t have a 4-point line. I would just remove the 3-point line and make the 3-point line even farther like the NBA,” pahayag ni Sotto.

May 23 feet at 9 inches ang three-point area sa NBA na mas mahaba kumpara sa regular na three-point area na 22 feet at 2 inches sa mga international leagues.

“The 4-point shot was exciting, of course, because you see somebody make a shot from so far, but I know they put it in trying to remove teams from playing zone but you don’t need to do that,” ani Ramos.

Maglalaro si Sotto sa Ko­shigaya Alphas, habang si Ramos naman ang team captain ng Levanga Hokkaido sa Japan B.League.