Lithuanian import isasabak ng SMB
MANILA, Philippines — Isang Lithuanian import ang ipaparada ng San Miguel para sa darating na PBA Season 49 Governors’ Cup.
Isasalang ng Beermen si 6-foot-6 Tauras Jogela para sa season-opening conference sa hangaring wakasan ang kanilang siyam na taong pagkauhaw sa Governors’ Cup crown.
Huling nagkampeon sa nasabing torneo ang San Miguel noong 2015 sa likod ni import Arizona Reid kung saan nila winalis si reinforcement Romeo Travis at ang Alaska, 4-0, sa best-of-seven championship series.
Nakapaglaro na ang 31-anyos na si Jogela sa mga liga sa Romania, Latvia, Poland, Hungary at Austria.
Magbubukas ang PBA Season 49 Governors’ Cup sa Agosto 18 kung saan magkakasama sa Group A ang TNT, Magnolia, Converge, NorthPort at Terrafirma.
Nasa Group B naman ang Ginebra, San Miguel, Blackwater, Phoenix, Rain or Shine at NLEX.
Bukod kay Jogela, ang iba pang imports na sasalang sa torneo ay sina Justin Brownlee ng Ginebra, Allen Durham ng Meralco, Aaron Fuller ng Rain or Shine, Darius Days ng TNT Tropang Giga, Glen Robinson III ng Magnolia, Myke Henry ng NLEX, Brandon Edwards ng Terrafirma at Ricky Ledo ng Blackwater.
Sina Days, Robinson, Henry, Edwards at Ledo ay mga bagong salta sa PBA.
Samantala, ibinigay ng NorthPort si Brent Paraiso sa Terrafirma kapalit ng Season 51 PBA Draft second round pick.
Dinala naman ng Rain or Shine si rookie Miguel Corteza sa Blackwater para makuha ang second-round pick ng Bossing sa PBA Season 51.
- Latest
