Eala swak sa Finals ng W25 Yecla tourney
MANILA, Philippines — Umabante si Pinay tennis sensation Alex Eala sa finals ng W25 Yecla tournament matapos hatawin ang 6-3, 5-7, 6-4 panalo laban kay qualifier Lucia Peyre ng Argentina sa kanilang semifinals duel kahapon sa Spain.
Sasagupain ng WTA World No. 266 na si Eala para sa korona si World No. 560 Valentina Ryser ng Switzerland na tumalo kay No. 4 seed Eva Guerrero Alvarez ng Spain, 6-7(6), 7-6(4), 6-4, sa semis.
“Over the moon to be competing in my first final of the year! Bringing the positive energy on the court tomorrow,” wika ng 18-anyos na si Eala sa kanyang Facebook post.
Nauna nang tinalo ni Eala sina British World No. 583 Katy Dunne sa first round, 7-5, 2-6, 6-2, at World No. 585 French qualifier Nahia Berecoechea sa second round, 3-6, 6-1, 6-1.
Matapos kunin ang first set ay isinuko naman ni Eala, ang reigning US Open Juniors singles winner, ang second set, 5-7, kung saan nakatabla ang two-time ITF women’s singles champion na si Peyre.
Sa third set ay itinala ni Eala ang 5-2 bentahe na naputol ni Peyre sa 4-5.
Ang tatlong match points ni Eala ang tuluyan nang nagpasok sa kanya sa finals at tinapos ang kanilang duwelo ni Peyre sa loob ng dalawang oras at 25 minuto.
- Latest
