Brownlee bumida sa pagresbak ng GSM

MANILA, Philippines — Matinding pagbawi ang ginawa ni import Justin Brownlee matapos malimitahan sa conference-low na 12 points sa Game Two.

Iniskor ni Brownlee ang 18 sa kanyang 29 points sa second half para igiya ang nagdedepensang Barangay Ginebra sa 117-103 paggupo sa TNT Tropang Giga sa Game Three ng 2023 PBA Governors’ Cup Finals kahapon sa Smart Araneta Coliseum.

Nagtala rin ang six-time PBA champion import ng 8 rebounds at 5 assists para sa 2-1 abante ng Ginebra sa kanilang best-of-seven championship series ng TNT.

Kumamada si Jamie Malonzo ng 27 points tampok ang anim na triples at may 22 markers si Stanley Pringle mula sa perpektong 6-of-6 shooting sa 3-point line.

“They made some real good adjustments in Game Two that caught us off guard and so we had to readjust,” wika ni coach Tim Cone. “They’ll gonna come in Game Four and do the same thing.”

Nalimitahan ni import Rondae Hollis-Jefferson si Brownlee sa 95-82 pagtabla ng Tropang Giga sa Gin Kings sa Game Two.

Ngunit hindi sa ikala­wang sunod na pagkakataon.

Kumonekta si Brownlee ng dalawang tres habang may dalawa si Jamie Malonzo sa inihulog na 19-7 bomba ng Ginebra sa fourth period para ibaon ang TNT sa 107-95 sa hu­ling 4:34 minuto nito.

Nauna nang itinayo ng Gin Kings ang 13-point lead, 27-14, mula sa tres ni Malonzo sa huling 1:45 minuto ng first quarter bago nakatabla ang Tropang Giga sa 88-88 sa 8:56 minuto ng final canto.

Ang 3-point play ni Scottie Thompson, tumapos na may 16 points, 10  assists at 5 rebounds, ang nagbigay sa Ginebra ng 118-101 bentahe sa natitirang 1:36 minuto ng laro.

Humakot si Hollis-Jefferson ng 32 points, 10 boards at 6 assists at may 19, tig-14 at 13 markers sina Mikey Williams, Jayson Castro, Poy Erram at Roger Pogoy, ayon sa pagkakasunod.