Ginebra giunhan ang TNT

CEBU, Philippines — Si Justin Brownlee ug ang iyang mga teammates mipakita og dalaygong salida sa dihang giunhan sa Barangay Ginebra Kings ang TNT Tropang Giga, 102-90, sa ilang best-of-seven PBA Governors' Cup Finals niadtong Dominggo didto sa Smart Araneta Coliseum.

Ang way pagbahar nga import sa Ginebra mibubo og 17 sa iyang 31 puntos sa unang kuwarter uban ang 12 ka rebounds samtang sila si Jamie Malonzo, Christian Standhardinger, Scottie Thompson ug Stanley Pringle mihimo sab og kasikas sa kampo sa Kings.

Si Malonzo mipupo og 21 puntos samtang si Thompson mirehistro og triple-double uban ang 10 puntos, 13 ka rebounds ug 11 ka assists.

Wala sab magpa-alkansi si Standhardinger nga dunay 16 puntos ug 11 ka rebounds ingon man si Pringle nga mitali og 11 puntos.

Dominante kaayo ang Kings nga sa usa ka higayon naglabaw og 18 puntos.

Si Rondae Hollis-Jefferson maoy nangu sa TNT uban ang 30 puntos ug 20 ka rebounds. Si Mikey Williams miposa og lima ka tres sa iyang 23 puntos samtang si Calvin Oftana mitampo og 16 puntos sa pilderong kawsa.

Ang Game 2 gikatakda karong Miyerkules, Abril 12, didto gihapon sa Big Dome.