Ginebra, TNT nangandam sa huego todong kumbati

CEBU, Philippines — Lastimosa, Tim Cone karibal na apan napuno sa respeto

Ang Barangay Ginebra Kings ug ang TNT Tropang Giga parehong mipadayag sa ilang kaandam alang sa giatngan nilang best-of-seven finals series alang sa kampiyonato sa PBA Governor's Cup nga sugdan karong Dominggo didto sa Smart Araneta Coliseum sa kaulohan.

Sa labing una niyang PBA finals isip coach, ang 59-anyos nga si Jojo Lastimosa sa kampo sa TNT naka-angkon og oportunidad nga makig-atbang sa kanhi niya magtutudlo nga si coach Tim Cone sa Ginebra.

Sila si Lastimosa ug Cone dili na estranghero sa usag-usa gumikan kay taud-taud man silang nagkauban sa bulawanong panahon sa Alaska Milk niadtong dekada '90 diin sila nakampiyon siyam ka higayon apil na niini ang talagsaong grandslam niadtong 1996.

Karon, anaa na sila sa managlahing habig.

Si Cone naglaraw nga inaton ang iyang PBA record ngadto sa 26 ka titulo samtang gisaytan ni Lastimosa ang makasaysayanong korona sa una niyang komperensiya isip coach.

Managkaribal man tuod sila ning higayona apan si Lastimosa ug Cone napuno gihapon og respeto sa usag-usag luyo sa halapad ug halandumon nilang pinagsamahan.

"I'm always comfortable being around Tim. I'm excited to be on the same floor with him. There's so much respect. He's done so much for the game, and I'm just here to learn and we'll see how it goes," matud pa ni Lastimosa.

Mao sab ang sentimento ni Cone nga mitamod sa iyang team captain ug assistant coach uban sa Alaska.

"There's going to be respect on both sides of the floor, but there's going to be really intense competition," dason pa ni Cone, nga maoy labing daogan nga coach sa kasaysayan sa PBA. "His organization is really hungry for a win, and we know and understand that. They played like that all conference long."

Sa bugtong nilang engkwentro ning komperensiya, gipukan sa TNT ang Barangay Ginebra, 114-105. Tungod niini, ang Tropang Giga nakapabor og gamay sa ilang tapad apan si Lastimosa mipahimangno nang daan sa iyang mga batos nga dili angay mokompiyansa ilabi na kay ang Ginebra maoy defending champion.

Sa iyang bahin, si Cone naglantaw sa TNT nga usa ka lig-ong kaatbang apan dali nga mipadayag nga andam silang hatagan ang ilang mga karibal og usa ka huego todong kumbati.

"It's not going to change our approach whether were the favorites or the underdogs. They're going to be formidable, we know that," batbat pa ni Cone. "We'll just go out there and make them uncomfortable.