Petro Gazz-Creamline papagitna sa PVL finale
MANILA, Philippines — Dinagit ng Petro Gazz Angels ang PLDT High Speed Hitters, 25-17, 25-23, 25-15, sa do-or-die semifinals upang umabante sa championship round ng 2023 Premier Volleyball League (PVL) All-Filipino Conference kahapon sa MOA Arena sa Pasay City.
Bumandera sa Gazz Angels si MJ Phillips na humataw ng 15 points sa likod ng 11 attacks at 4 boocks at nag-ambag ng 13 at 12 markers sina Jonah Sabete at Grethcel Soltones, ayon sa pagkakasunod.
Kumamada rin ng 11 digs at 11 receptions si Soltones, habang may 2 blocks si Rem Palma para sa kanyang 9 points.
Minanduhan ni Djanel Cheng ang opensa ng Petro Gazz sa inilatag na 17 sets at pambihirang floor defense ang ipinamalas ni Cienne Cruz sa kanyang 17 digs.
“They accepted the challenge and acknowledged that they can do it. Yesterday pa lang, I saw fierceness in their eyes. They really wanted to bounce back,” sabi ni coach Oliver Almadro.
Nakauna ang Petro Gazz sa Game One, 22-25, 25-19, 25-21, 25-18, subalit nadiskaril ng PLDT sa Game Two para mauwi sa Game Three.
Hindi pinaporma ng Gazz Angels ang High Speed Hitters tungo sa finals kontra sa Creamline Cool Smashers.
Lalabanan ng Petro Gazz ang Creamline sa ikaapat nilang PVL title series at umaasang makakabawi matapos mabigo noong 2022 Open Conference.
- Latest
